Jugi-Weekend and der Lenk

«Kantöndli-Wettkampf» am 2. und 3. Juni an der Lenk: 

Am Samstigmorge hei mir üs in Aumedinge troffe, 

ufem Parkplatz vor Mehrzwäckhaue si d’Ching nadisna igloffe.

33 Ching u 10 Leiter,

ä grosse Huufe, das wird de heiter!

Pünktläch am Nüni isch dr Car losdüüsed, 

uf d’Outobahn Richtig Spiez, wie aui wüsse.

Z’Kuspo ir Länk isch üses Ziel, 

mit viu Gelächter u Gsang chöme mir guet dert hii.

Aus erschts wird’s Jugi-Shirt verteilt u o Trinkfläsche,

z’obligate Gruppefoto isch o nid vergässe.

Ungerem Motto „Kantöndli-Wettkampf“ simer gstartet,

uf d’Bekanntgab vo de Gruppe hei aui scho gwartet.

Zug, Basu-Stadt, Nöschatel, Wallis, Tessin u Bärn,

üsi Uswahl vo de Kantön hei nid aui gärn.

Mit Löösle si si zueteilt worde u scho glii

si super schöni Wappe u Teambänder kreiert gsi.

Nacheme feine Lönsch simer i Wettkampf gstartet,

d’Ching hei voller Motivation scho druf gwartet.

Gummistiefel schiesse, Chrütli schmöcke u Chriesistei spöie,

ä Chlätterparcour, Chääs errate u Ping-Pöngle.

Das sie di erschte 6 Diszipline gsi

u aui si mit viu Ehrgiiz drbii.

Gstärcht vom Zvieri geihts wiiter,

wär wird ächt am Ändi dr Sieger?

Ob bim Naturpizza bache, äs Wasserballon-Spieli oder Hufiise wärfe,

bim Stei stosse, Schwiizer-Quiz oder Garettle - üsi Jugeler hei aues gäh.

Nach so viu bewege u studiere simer aui hungrig gsi,

z’erscht het aber dr Zimmerbezug und ä Duschi müesse sii.

Im Kuspo hets äs feins Znacht gäh,

am Salatbuffet u s’Menu bis gnue hei aui chönne näh.

Ä Blick veruse, mir heis fasch nid gloubt,

es schiffet in Ströme, merci Petrus, hesch üs verschont.

Dr Wettkampf isch aber no nid verbii,

Kanton gäge Kanton bim Seili zieh.

Jede gäge Jede, es isch ä spannendi Sach,

am Schluss hei o d’Leiter no d’Muskle uspackt.

Bim schutte, Beach-Volley oder eifach chli sii löh mir dr Tag lah usklinge.

Nachtrueh isch am Zähni, o we das d’Ching gar nid kuuul finge.

Nachere meh oder weniger erholsame Nacht,

geihts zum Zmorge iz Kuspo, was für ä Pracht.

Milch, Brot, Saft, Ufschnitt u natürläch Kafi,

Müesli, Anke, Gonfi u Chäs – es het für jede öpis drbii.

Packe, ufruume u Zimmer wüsche isch di nächsti Disziplin,

aui häufe enang – vo Gross bis Chlii.

Hüt steiht äs Spieli-Turnier ufem Programm,

mit nöie Gruppe, 4 a dr Zahl.

Am Morge wird Unihockey gspielt,

abwächsligswiis miteme 4-Gewinnt.

Schnälligkeit u Taktik isch bi beidne gfragt,

wär het ächt die beschte Spieler parat?

Mittlerwiile strahlt d’Sunne vom Himmu, mit voller Chraft,

was die Junge zure Wasserschlacht am Brunne veralasst.

Früsch gstärcht vom Zmittag im Kuspo u abeküehlt geihts wiiter,

d’Spieli ufem rote Platz oder uf dr Wiese, was isch ächt gschiider?

Brönnball im Wächsu mitere Stafette zum Keule schiesse i dere Wärmi

sorgt bi mängem Ching und o Leiter für es nasses Hemli.

Scho isch ou das Turnier wieder verbii,

aui si mit viu Elan u grossem Iisatz drbii gsi.

Nachem Zvieri gits no ä feini Glace,

mir hei dänkt, das würd aune no passe.

Dr Car isch scho wieder iitroffe,

aber üses Rangverläse isch doch no nid gloffe.

Z’ersch d’Uflösig vom Spieli-Turnier,

Team Rot vor Grüen, Gäub u Blau isches hie.

Bi de Kantön git ä klare Sieger,

Nöschatel isch mit 70 Pünkt dr Leader.

Dr Kanton Zug isch ufem 2. Platz,

gfolgt vom Tessin (4.) u Basu-Stadt (3.)

Ufem 5. Platz si punktgliich z’Wallis u Bärn,

d’Spitzbueb-Medallie hei äuä aui gärn.

När heissts Gepäck u Material schnappe

u aues wieder irgendwie i Car ine lade.

Dr Schofför bringt üs sicher zrügg uf Aumedinge,

nachem Uslade u Verabschiede tüe mir z’Material id Halle bringe.

Es riese Merci a aui Leiter für d’Organisation und a aui Ching, wo üsi Ideä hei dörfe umsetze!

M E R C I   V I U   M A U  –   es het gfägt!!!

Anita Zurbuchen u aui Leiter